2013年9月30日星期一

2013遊學。Chapter 10-啟程(下)

一個人系機場,第一次唔系為左工作;依家既感覺比當初公佈新丁結果仲緊張同期待。

自问系唔痴家既衰仔,今日临上机都专登打俾爸爸,倾左一阵,觉得自己好似未长大甘。任意妄为既脾性始终如一,但仍然庆幸仲有丁点既坚持。

今日使開d死黨,自己搭的士去機場,都系個句“90日咋,你估移民咩?”。系的士上一路友人打黎say goodbye,个种感觉虽然怪怪地,但却出奇地感动。

雖然短短90日,但就好似慢慢歸零再啟動;我好討厭“熱血”尼兩個字,但今晚自覺系30年黎最為熱血既一晚。。

ps:好啦,聽日到步仲要指手劃腳問路,真有趣。。

2013遊學。Chapter 9-啟程(上)

真系小學作文話齋“一眨眼4個月過去了”,離職足足4個月,今晚要啟程了。

今晚11點20分班機,KLM航空,12粒鍾飛往阿姆斯特丹逗留50分鐘再飛2個半鍾到馬德里,預計西班牙時間朝早9點25分到達馬德里機場(比馬來西亞慢6粒鍾)再搭3粒鍾巴士就到目的地-薩拉曼卡,將會系個度75日。
已經逼爆,留意-行李包括咖喱口味即食麵兩包
舊年11月做左個任性既決定,暫別日復一日既生活模式,實踐我入行廣播之後最想做既事-一個人到完全陌生既國度至少生活3個月,而西班牙確系我第一選擇。友人都問“點解系西班牙?”。。。mmh,應該好似喜歡一個人甘,無乜理由,系感覺。

90日,只系短短90日既所謂遊學時間竟然可以令我生活起好大既變化,生理心理同經濟上。可能有人覺得奇怪,90日咋喔??使唔使吖??對於我,的確系既:

@我唔系有錢人。身為“人”又點會無生活負擔吖?!供乜供乜甘,一切將暫拋諸腦後,2014年再打算。

@由第一日出黎社會工作,我都捻住會唔會平平淡淡甘過晒呢?事實系一個難安於現在既人,外出體驗既機會令詎豁出一切,包括需要重新建立我既夢想事業,最多由零開始咯,有手有腳肯做,無問題既~~

@重新檢視30歲既自己,單獨一人面對系最真實既答案。至少我未認清自己。

@分享需要經歷,我經歷不足。讀萬卷書確系可以言之有物,但行萬里路才能領悟當中。

@再不瘋狂我就老啦,到時想要實踐任何事可能都只能得個想字。加上我仲覺得,我無甘長命。

@Shopping、狂吃、跑景點。。nonono。。尼刻提醒自己,今日尼個決定唔系淨為尼d野。

當然仲有一大堆俾自己繼續完成既勇氣藉口。寫到尼度睇到好多facebook既朋友留言,系度捻,我真系太好運了,試問一個普普通通口賤賤既人,點會有人祝福你呢?(眼汎淚光ing)老土一句多謝,我唔系d熱情既人,可能從來無回復或回應過,但所有留言我都會睇我都知道。再一次多謝。

「我只系去90日,12月30號,我會番黎架」!



2013年9月27日星期五

2013遊學。Chapter 8-收拾

有幾樣野要收拾:

《房間》
are_you_ready-765089
圖取自網絡
一個字,亂。近排摷衫又成甘,成間房已番轉(平時都甘上下亂)

《行李》
兩個字,加減。冬季兼今次唔系購物團,要加衣物;獨行俠既旅程,盡減重量。

《心情》
三個字,略忐忑。期待、憂慮、興奮。。。其實都系“哈哈哈”~~

《美食》
星期一上機,仲有3日大馬美食等我去“收拾”@@


2013年9月26日星期四

2013遊學。Chapter 7-國際駕照IDP

左度右度,度唔掂;決定去申請張國際駕照(International Driving Permit)。原因:

@歐洲既公共交通費用相當恐怖(貴),尤其火車票可以話系最得人驚(貴過飛機票)。
@讀課程既小城要去其它市鎮大部份都需要去馬德里轉車/火車,索性自由d租車。
@西班牙汽油雖貴(大約1.47歐羅/公升),但勝在租車都算平。

申請國際駕照步驟:

》一張passport size照片
》駕照複印本(最update+有相版本,前後)
》身分證複印本(前後)
》去任何一間JPJ填一張form(有晒指示,超簡單)
》攞number,交晒以上文件
》繳交rm150(一年期限,之後再renew)
》5分鐘之後,到手(快到難以置信)


有時會覺得擁有馬來西亞護照同駕照都相當方便,因為尼張國際駕照可以系全球超過100個國家使用。而我知道又無列名既國家就系香港、台灣同朝鮮;其它基本旅遊勝地都無問題,例如韓國、美國、歐洲、新加坡、泰國、日本等等都通用無阻。系啦,仲有中國都得(心捻“唔會系香港同台灣都歸類為中國呱??”)裡面有數頁不同語言既說明,方便當地交警查閱使用,仲有張大頭相添!決不能share share用矇混過關。

IDP就攞左啦,電話都有什麼waze、google map導航,最頭痛既應該系d路牌提示同基本泊車規矩。

OK,路在口邊,問人咪得咯,有方案解決既就唔系問題啦~~

2013年9月25日星期三

2013遊學。Chapter 6-安慰字典

買尼本“迷你”型字典系因為:

令自己安心D,裡面有好多“門面輔助句子”。
個個都話系“必備”,所以必買。
細細本,方便兼慳位。
西英對照!揾唔到西中對照,唯有順便練習英文。
本書好順眼。
rm24.90,甘平,買咯。



當一個人無人無物人在異鄉唯有靠沈默老師既指引@@

2013年9月24日星期二

拔罐歸西篇

估唔到都幾痛下架,不過對於一個按摩背脊都痛到v哇鬼叫既懶鬼散弱中坑黎講,尼種“幾痛架”可能你會當俾蚊叮。

第一次拔罐,個friend話唔痛兼幾好訓,所以就去試試。過程系:

1》除低上衣,背向醫師;
2》抹抹背脊,細火烘罐;
3》第一個罐,游走尾骨;
4》鎖定位置,由頸開始;
5》肩部五罐,背部八罐;
6》十三齊發,待五分鐘;
7》逐一拔罐,大功告成。

點解我話“幾痛下”呢?皆因系個罐吸住個後頸位置既時候逐漸緊繃,甚至你無法郁動頭部,想像13個罐同時系背部吸實(莫非系失傳已舊既吸星大法?)都幾系野架!加上大概兩分鐘左右每個罐位置都有d火刺刺既感覺,講唔上痛但就幾㷫!結果搞掂之後步出治療室系成頭大汗(都話我頂唔順熱架啦!)。

拔罐完畢就好似按摩完個背甘,不過就有某d位置例如肩部同頸部就有d隱隱作痛(難道暗病纏身?)。1次治療、5分鐘、15蚊留下13個麥田圈,尼個體驗幾有趣,絕對有下次。

ps:出發西班牙前都意思意思調理身體咯,雖然last minute,但足以證明我系馬來西亞人。

2013年9月23日星期一

無開工=無工開??

我既無開工绝对唔等于無工開,皆因一個正面,一個負面:

無開工:無收入,極度無聊。
無工開:無收入,極度惆悵。

無開工:自認唔差攞黎。
無工開:公認好差導致。

話雖如此,但無開工同無工開有一個共同點=《識得人少》
ps:又系喔,我系獨家村村長。哈哈哈,不過2014年定必全面復工,只係未捻做咩者~~

2013年9月20日星期五

我係邊舊??

確實整個娛樂圈既風氣都系圍繞著“腹肌”“人魚線”,周杰倫、彭于晏、張家輝、羅仲謙、顧佑銘等等;就連最近“企鵝型肚腩佬”杜汶澤都塑肌成功在望,更令到班男仔/佬個個趨之若鶩。變大隻仔/佬最重要既系:

《體力》
能人所不能既運動量,唔系d跑下步,三兩下sit up個d;淨系舉鐵又成甘都攞命。(講真,有d定唔順舉鐵者發出“err,err,err”好賣力既聲音!疑問:系咪事必要發出聲架咧??)

《餓力》
其實都會飽既,只系吃d烚雞胸、烚蛋(6粒起跳)、齋薯泥等等淡而無味既催谷肌肉食品。我相信都有人話好好味。。。。只系我從未聽過者。

《動力》
梗有個好明確既目標!例如d明星們就“角色需要”“演唱會睇頭”“出寫真”等,一般人就應該系得番“增加男人魅力吸引伴侶”尼個聽落膚淺但又好鬼有意義動力既目標!!

奇蹟往往系創造出黎架,尤其系身體肌肉既變化;無論系1舊變6舊或6舊變1舊,都系自己攞黎既!甘究竟系為左6舊定1舊較為「自己攞黎賤」呢?任君選擇。

ps:人總想挑戰d人地眼中無可能但自己竟然覺得應該做到既事,2013年結束之前,我會系邊舊呢??

2013年9月19日星期四

沙巴住宿篇-Little Hut@Kundasang

去沙巴除左癡飲癡住家姐之外都需要揾番晚同班friend行遠D留宿下。今次系神山腳Kundasang,kg mersilao訂左間民宿《Little Hut》,尼間民宿真系幾值得推薦@@

樓上既睡房有三個重點:1》床褥舒服 2》超大對外窗景色一流,可睇星星  3》超心思壁畫

有個特製既樓梯(其實好穩陣但都系要小心d),樓下尼個單人床空間系全屋最暖(晚上好凍架,20度以下)、廁所(忘記影,特別提醒:雖然有熱水器,但真系早d沖涼好d,我地成班叻叻甘10點至沖涼,結果不斷嗌晒救命)。
樓下空間很大,仲有廚房(廚具非常齊全,系無雪櫃)連接飯廳、同大門一入黎既聊天室(又一個超大窗口睇到出面露台,景果然靚)。
尼間民宿有四棟獨立屋,有兩人間同我地尼款一家人既。我地住尼間《Hut Attack》五人間我覺得最正,因為好private,有屬於自己既露台同其它三間有d距離~~
晚上等星星真系靠運氣。9月開始雨季,多雲大霧以致晚上12點都睇唔到星星。死心不息地凌晨5點起身,yes!!!滿天星~~而且天都開始光咯!(果然好早天光)
景色靚到系會忘記自己身在馬來西亞(國外月亮比較圓心態),聽住d英文老歌真系幻想自己系瑞士~~民宿一開門口就望到神山!!不過都要睇運氣,因為座神山好神奇地7點之後就被雲完全遮掩晒,好似從來無出現過座神山甘!記得要早起身碰碰運氣~~
Kundasang距離KK市中心要接近2小時車程(因為山路彎曲加上好多大羅哩行使)。間民宿比神山公園仲要遠d,記得用google map或waze揾揾。






2013年9月18日星期三

沙巴美食-旺旺魚湯面


今趟系第一次同幾個friend一齊去沙巴“玩”(前一次爬山,兩次探親),又吃到好野!













晨早8點姐夫就帶我地去“必吃早點之一”既《旺旺茶餐室》。尼間聽講系老字號,食店其實位於商店區但詎就偏偏系後巷位置,好在個招牌大大個。見到門面都“哇”左一聲,人山人海(包括友族同胞)!










店裡面既招牌就系魚湯麵,有tomyam同清湯。勁推薦tomyam湯,味道同平時有d唔同,比較似curry tomyam,醒神到爆但唔會辣!!










如果喜歡吃新鮮魚既朋友可以再加蒸或香煎魚肉,新鮮食材果然唔放配料醬油都好正!!

ps:店門口有個小檔系賣新鮮魚頭,捻住上神山腳住番晚打邊爐既朋友可以考慮賣番兩個熬湯!
















2013年9月17日星期二

Surprise!!??

離開直播室超過100日,但仍然仲有friend覺得好“surprise”。尋日臨“冬眠”前收到個friend whatsapp,我捻surprise既原因系:

《無捧場》
死仔包從來都無聽過我做節目!!
(解釋:詎聽英文台)

《錯覺》
莫非我尼100日都唔似無業遊民??
(解釋:都怪多姿多彩既facebook update)

當然,我都會覺得surprise因為詎問我“no regret?”,一個唔肯定既答案-“not yet”,可能暫時未呱,世事難料。

Never say Never。

2013年9月16日星期一

916馬來西亞日

今日系東馬加入正式成立馬來西亞既50週年大日子,甘多年黎都無麼特別感覺;但適逢今年身在東馬沙巴州探親兼旅行,個腦海就浮現好多個問號:

《點解既??》
《可以唔要無??》
《甘都得??》
《如果唔系既話,會點??》

只要你都一樣聽到d關於點解東馬加入既“飛機失事傳說”,你可能都會出現以上既問號。

Ps:《唔知仲有無機會變呢??》

2013年9月13日星期五

冻天的诱惑

Kudasang,有记忆中算第一次到访。

离KK市中心大约2小时路程(上山路有好多大罗里慢行),神山山脚区。今趟梗系无上神山啦(要提早预约架),一行4人系Kg Mersilao租左间独立民宿,无目的-斋hea。

沿路山景确系令人醒醒眼睛,但最舒服莫过于有种好懒散既感觉;冻冻地,成个人都慢D。热带生长既我都会不时羡慕下有冻天既国家,因为:

<服饰型D>
<无甘易出汗或油淋淋>
<感觉浪漫D>
<无甘易扯火>
<可以不断打边炉>

可惜得个两日一夜,听日又继续热。

ps:相当喜欢呢间民宿,简单、心思、自由(下星期番kl至详尽d讲解)。

2013年9月12日星期四

Holiday@何年希

展开2013年最后一个本土holiday trip@沙巴,但今日捻起另一个"Holiday"。

「冲上云霄2」里面陈法拉饰演既何年希Holiday之所以令两个成熟既男主角sam同jayden为之疯狂系有d因由既:

<任性>
无时无刻都难以捉摸兼充满新鲜感但并唔系娇生惯养公主病既任性,受!

<感性>
感情观念既痴情又带点理性、野蛮又肯为爱侣作让步既感性,受!

<性>
。。。请自己留意剧中既精彩情欲片段,受!

总结系,两个Holiday都会有吸引力;可惜其一只受男士欢迎多D甘解。

2013年9月11日星期三

謎團:沙白vs啦啦

個晚Putrajaya跑完5公里同班friend宵夜打邊爐,遇到個迷思;紀錄番當晚既實況對話:

「Puchong某間火鍋店」
我:唔好意思,碟啦啦可唔可以拿去炒吖?我唔系要退,但尼個唔系沙白,唔啱打邊爐
店:我幫你問下~~
「幾分鐘後」
店:我問左,唔得喔。
我:點解呢?
店:。。。
我:你攞個menu過黎。。。你睇,menu尼度寫啦啦但張相系沙白,不過你依家真系攞左碟啦啦俾我,但系我要既系你menu裡面張相既沙白喔?!甘點呢?
店:噢。。。等等。。
「又幾分鐘後(另一個侍應)」
店:系甘既,我地系跟個字既。
我:甘張相??
店:噢,張相唔關事既,我地系跟個字寫咩。就好似我地有個竹筒魚滑,不過我地唔會上埋個竹筒,淨系將個魚滑放系碟到上俾客仔。
我:(驚訝!)兩件事黎架!你無竹筒用碟始終都系魚滑吖!但張相系沙白不過你攞碟啦啦俾我喔?!無理由我點虎蝦你俾我蝦米架?!唔通你話都系蝦啊?
店:甘。。。
我:我都話唔系唔要你碟啦啦,系麻煩你幫我轉去炒者!你menu都有炒啦啦架嘛!
店:。。喔。。。ok既,不過要加4蚊。
我:絕對無問題,唔該你。

最後我會好聲氣甘講“唔該”系因為侍應由頭到尾都有禮貌笑笑口甘同我溝通,但個“竹筒邏輯”我就唔系好明!?(況且詎話跟menu既字,“竹筒魚滑”你都用碟?)

餐廳點菜我都明白圖片只做參考,但都無理由我點A詎黎B甘離譜都得架?仲成世界既!!

ps:經過尼件事,我對自己既辨識能力存疑;究竟沙白系咪啦啦呢?一直困擾!!有一刻好想打俾峰哥大城心事問個明白。

2013年9月10日星期二

Doraemon 2020


《申奧成功 哆啦A夢當大使功不可沒》

「其實每個國家奧委會在類似活動時都會有親善大使,但幾乎都是由該國最出名的運動員、選手擔任,日本這次使用動畫人物,而且是全球知名的哆啦A夢,國外媒體分析認為,對日本的形象及最後成功申奧,功不可沒。东京2020奥申委首席执行官水野正人表示:“‘多啦A梦’代表了日本动漫,它在全世界的成功与流行,证明了日本有能力激发与鼓舞更多年轻人,也证明日本有能力举办一届奥运会来更好地弘扬奥运精神并鼓励年轻人追求自己的梦想。”」21cn體育+HK蘋果news

雖然好似唔系好關我事,但奇在見到個消息真系勁開心,決定:

「若然屬實我的超級英雄多啦A夢(童年既最佳伴侶叮噹)真系當選2020東京奧運吉祥物既話,我就一定會飛去日本為詎打氣」

ps:終於2020有野可以期待啦~~Doraemon 2020~~

2013年9月9日星期一

Fun Run 2013

舊年膽粗粗參加10km跑,今年同班friend參加5km fun run,感覺有d唔同:

《時間。地點》
上次系朝早7am開跑,今次就820pm開跑。晚上遇到雨天不過就難得可以淋淋雨,晚上既景色確系靚d(可能地點系遠離市區既布城呱)。







《快d但忙d》
得5km梗系快d到達啦,但就多d時間同精力可以一路拍攝fun run紀錄片段一路慢跑,好忙but就有好正既feel。



《好著數》
今次完成後既goodies bag好恐怖!!裡面包羅萬有,人地唔知仲捻住我地after shopping!幾十蚊既報名費淨系件T恤加甘鬼重既goodies bag同現場免費飲飲吃吃玩玩=超晒值啦!男女既禮品系唔一樣架,主辦單位好有心思!但真系有d驚訝會派送避孕套俾現場既男士,莫非覺得跑完之後大家warm up晒可以繼續運動??!!真貼心~~




《同路人》
好明顯參加都唔系為任何獎項(亦無資格,哈哈)最主要系一班傻傻既老友記共同參與、經歷、回味仲可以一齊既時刻!離開學校出黎社會工作後既老友記已經好少有機會成為同路人,好多形同陌路,珍貴既片段真系要好好甘珍惜。

 Ps:雖然我跑得好慢(。。行。。),但真系越黎越中意參與尼種嘉年華式既活動,而且系成班人一齊玩樂。為左獎勵自己完成任務,是夜成班人去打邊爐宵夜慶功!








2013年9月6日星期五

壞消息

無論好消息或壞消息都系會令腎上腺飆升,係一種好刺激既驚喜/驚嚇。

咩係為之壞消息呢?除卻死人塌樓:

《同錢掛鈎》
一個字=債。

《同情掛鈎》
兩個字=孽緣。

《同變掛鈎》
三個字=好麻煩。


以上3項若然同時間出現兩項或以上,壞消息程度不遜於死人塌樓。
ps:尼幾日最壞既消息就系-臨時被通知捻住安排好既西班牙住宿突然Fully Book,訓街咯。


2013年9月5日星期四

釀豆腐哲理

釀豆腐細細個唔吃,依家反而ok,尤其釀苦瓜~~釀豆腐教曉我做人既道理(好夾硬甘)!

《唔可以趁熱》
好多人話趁熱好吃,錯!應該系攤一陣未冷前吃。好似一件壞事未搞清楚前唔好衝動,timing好重要,但就要趁未擴散惡化前解決~~

《選擇多,但唔磨》
磨=慢手慢腳。花多眼亂既世界太多誘惑,揀定離手要專注,免得揀黎揀去變成無得揀。

《無最彈牙,只有更彈牙》
尼句好易明,即系一山還有一山高,強中自有強中手,唔好懶叻!

好啦,講完人生道理都肚餓架啦,去片。。。




2013年9月4日星期三

無聊晨功

無聊系一種境界,一種突破自我既境界(講到好玄甘)。
當一個人無聊既時候,詎會開始揾d野做下,因為有d野系會無聊既時候至甘願去做,例如:

《逛d平時唔會瀏覽既網站》
《幾乎三唔識七都去留言》
《親自下廚整番幾味》
《真系好餓至吃野》
《奇蹟地自發性去運動下》
《自己解決電腦軟件問題》

暫時我多一樣《得閒無事拍d更無聊既視頻》整番輯《無聊晨功》

2013年9月3日星期二

食晨-韓式鐵板料理

吃喝玩樂系人生大事,當然如果能夠分享尼份玩樂喜悅就最正啦。

我唔系d咩美食專家達人,只系將自己試過覺得唔錯既紀錄低;所以9月份趁住得閒就周圍行下、吃下、睇下兼用手機拍低再簡單用手機處理剪接同配音(最懶死既我只會用最簡單慳時既做法,配音都一輪嘴儘量介紹,講快過寫)。

第一集就介紹我周不時去吃既韓國鐵板料理~~Uncle Jang@@

韓式鐵板料理視頻
有興趣既朋友可以去試試吃喝玩樂,或者都歡迎介紹d好味、好玩或者有特色既事物俾我,趁住得閒28日吖嘛~~



2013年9月2日星期一

香港小姐2013

一開場就有心水-17號Grace,原因??一列排開,就淨系留意到詎。

陳凱琳
冠軍:Grace陳凱琳
今屆港姐選舉一直都無關注,但循例都會睇個總決賽既,一個一家人坐埋睇節目既習慣。可能真系細細個開始睇港姐選舉節目,總覺得今屆漏左d集體回憶,例如:

《與偶共舞》
偶像既偶,以往都系一班港姐化作伴舞穿梭於當紅偶像歌手既演唱中亮相或表演,我仲捻住會有cool魔張智霖,至少俾個Fred鄭浚泓都好吖!!結果,港姐“齋跳”。

《刁難問答》
先撇開系泳裝問答既“服裝”尼個元素,問答已經無個種刁難既有趣畫面(刁難人好似好衰,但觀眾既我想睇)

其實今屆相對覺得由電視機前面睇到既港姐10強佳麗比上屆好架啦!!至少整體都好平均無太過“唔系嚇嘛!”尼個感覺,而場景都見到系落足心機既。

全香港接近25分之1既市民揀出黎既港姐冠軍,我覺得已經系好高既比率,皆因有好多所謂既“民意調查”可能系得個幾千人代表晒1千8百萬人(仲要系選擇性地區添。。)。

ps:睇香港小姐直播最吸引我既梗系-司儀啦,今屆新人當家(比起班前輩,詎地算新咯)但成晚最記得既就只有星級評審曾志偉揶揄其中一個佳麗個句 “詎無藏毒,不過人毒”。