「旅晨」日本神戶kobe分享（EP1）

關西地區，神戶係絕對推薦你去玩幾日架，因為尼度：

1:距離大阪大概個半鐘既火車程，算好近

2:kobe神戶最出名有我至愛神戶和牛

3:尼度有日本譽為3大最靚既六甲山夜景

4:充滿西洋風情既異人館街道

5:令人身心舒暢既有馬溫泉

由吉隆坡直達日本kansai機場之後通常旅客都會直奔大阪osaka，但如果你既行程想要體驗kobe神戶既話，其實由kansai機場去kobe都好方便架，而且好平又特別！全程大概個半鐘就會到達kobe架啦。可以跟住我既步驟：

1:到達kansai機場入境後就係lobby大堂既high speed ferry高速船櫃檯購買船飛，原價1850yen既單程船飛遊客show passport證明就只需500yen就得啦！（少於rm20，小孩半價）http://www.kobe-access.jp/eng/info_visitors.php

2:不過，你買左飛之後就直接行出航樓到出面等shutter bus免費載你去搭船架啦！大概7分鐘車程。

3:船飛係自由座架，好舒服又乾淨，30分鐘轉眼就過！落機直接搭船吹吹海風都唔錯架！

4:到達kobe機場大樓搭快鐵18分鐘就到kobe市中心架啦～～

日本搭公共交通係唔會因為大型行李而會覺得麻煩，因為一路上都會有親切既工作人員幫忙～～

kobe神戶擁有整個日本被譽為最複雜既公共交通系統。最主要係好多地下鐵既站唔集中，要轉站可能係需要行出一個大樓再入小巷入口轉列車架！所以身為遊客既我地就需要搵d方便交通既住宿地點啦！我自己住過兩個覺得非常唔錯架！

1:元町站-尼個站最靠近神戶中華街，即係唐人街。係附近有數之不盡既食肆，而且主要既轉換站都可以到達。尼度可為不夜城區，每個景點大約都可以步行15分鐘內到達！

2:三宮站-係神戶市區總站，人流勁多。下晝上班族集中，好多商場貫穿，shopping聖地。因為總站既關係，所以任何轉換線包括巴士站都係附近，但我發覺晚上既三宮站熱鬧程度不及元町站，其實兩個站大約步行15分鐘就到。

日本神戶北野異人館街

日本神戶充滿西洋或者異族風情，由於神戶港口的擴建、與外國人交易往來繁盛，使得這座城市開始成為外國人的移居地，尤其在能夠俯瞰海港的「北野」一帶，座落著各式各樣的外國商人民宅、領事館、特色街景，這些留下來的非日式建築就被統稱為「異人館」啦。

成條異人館街有太多靚到過份既建築，不過大部份都需要入門票，你可以選擇9間館既全套票，大約3500yen（rm130）或者逐間選擇都得，每間收費大約600yen（大約rm25）。每間館既裡面既裝潢都好有特色，值得一探究竟。尤其風見雞之館最受歡迎，紅磚外牆既建築前身係德國貿易商民宅，屋頂有個測試風向既公雞造型非常顯眼！對面就係一個小公園，不時會有d街頭演奏同畫像買賣，係附近既二樓cafe飲住咖啡靠著落地玻璃望著異人館街景真系好舒服。

黎到神戶kobe如果你想省d腳骨力既話可以選擇搭city loop環城巴士，一日無限loop只需 660yen。造型係西洋懷舊火車feel，我未試過因為都係用腳行。若然你一心要參觀異人館，尼度真系太多館消耗你既時間，基本上大半日就會留係尼區，ootd影相就吃唔少時間啦。

除左d西洋外國人館之外，值得一提係尼度有間日本第一間既starbucks咖啡館，前身有成百幾年歷史不過地震倒塌後跟番原貌修復重建再輾轉變成咖啡館，好靚。仲有一間sherlocks homes精品販賣館都好特別。另外係上集介紹過既風見雞之館附近有間必去既北野天滿神社，尼度既地勢比較高，需要行一段樓梯所以可以俯瞰到神戶市景，聽講唔少學生同打工仔都黎尼度供奉有成260年歷史既「學識之神」架！

好啦，下一篇就同你分享日本神戶kobe最正一日遊既有馬。六甲山旅程！

趁仲行得走得，跟住旅晨一齊睇世界